“भीम की शक्ती, धूम मचाए, सामने कोई टिक ना पाए” या प्रसिद्ध ओळींनी बालविश्वात लोकप्रिय ठरलेल्या ‘छोटा भीम’ या कार्टून पात्राची रंगीत दुनिया आता नाशिककरांच्या भेटीस येणार आहे. गंगापूर रोडवरील स्व. प्रमोद महाजन स्मृती उद्यानाचे नूतनीकरण पूर्ण झाले असून, या उद्यानात छोटा भीम, छुटकी, जग्गू, कालिया, गोलू अशी आकर्षक पात्रे लहानग्यांना खेळण्यासाठी आणि आनंद घेण्यासाठी सज्ज झाली आहेत.

या उद्यानाच्या नूतनीकरणासाठी मध्य नाशिक मतदारसंघाच्या आमदार प्रा. देवयानी सुहास फरांदे यांनी 5 कोटी रुपयांचा निधी उपलब्ध करून दिला आहे. सुमारे ४५०० चौरस मीटर क्षेत्रफळावर पसरलेल्या या उद्यानात समृद्ध हिरवळ, नाविन्यपूर्ण खेळणी, सुबक रचना, फायबरच्या प्राण्यांच्या मूर्ती आणि अत्याधुनिक सीसीटीव्ही सुरक्षा व्यवस्था अशी सुविधा उपलब्ध करण्यात आली आहे. त्यामुळे हे उद्यान नाशिकचे एक नवे प्रेक्षणीय आकर्षण ठरणार आहे.

या उद्यानाचे लोकार्पण २३ ऑक्टोबर २०२५ रोजी सकाळी 5 वाजता होणार असून, या सोहळ्याला प्रमुख पाहुणे म्हणून पद्मश्री सुरेश वाडकर, नाशिक विभागीय आयुक्त डॉ. प्रवीण गेडाम, पोलीस आयुक्त संदीप कर्णिक, नाशिक महानगरपालिका आयुक्त मनीषा खत्री, सिंहस्थ कुंभमेळा आयुक्त शेखर सिंग, तसेच जिल्हाधिकारी आयुष प्रसाद आदी मान्यवर उपस्थित राहणार आहेत.

लोकार्पणानंतर आयोजित “भाऊबीज पहाट” कार्यक्रमात पद्मश्री सुरेश वाडकर यांचे सुरेल गीत-संवाद सादर होणार असून, नागरिकांनी या मंत्रमुग्ध करणाऱ्या सांस्कृतिक सोहळ्याचा आनंद घेण्यासाठी मोठ्या संख्येने उपस्थित राहावे, असे आवाहन आमदार प्रा. देवयानी फरांदे यांनी केले आहे.